តុលាការដោះលែង លោក សាន្ត ប៊ុនធឿន, តែត្រូវឡើងសវនាការថ្ងៃទី២៥ខាងមុខទៀត
11-March-2016 | ដោយ មែន កំសត់
ភ្នំពេញ៖ មន្ត្រីតុលាការ ថ្លែងថាលោក សាន្ត ប៊ុនធឿន ដែលគេស្គាល់ថា ជាអ្នកសារព័ត៌មានតាមហ្វេសប៊ុក ត្រូវបានលោក គុជ គឹមឡុង ព្រះរាជអាជ្ញារងអមសាលាដំបូងរាជធានីភ្នំពេញ ដោះលែងឲ្យមានសេរីភាពឡើងវិញ នៅថ្ងៃទី១១ ខែមីនា ឆ្នាំ២០១៦ បន្ទាប់ពីសាកសួរ២ថ្ងៃរួចមក។
មន្ត្រីដដែល បន្តថា មូលហេតុនៃការដោះលែងនេះ បន្ទាប់ពីលោក សាន្ត ប៊ុនធឿន តម្កល់ប្រាក់ចំនួន៤លានរៀល។ ទោះបីយ៉ាងណា សំណុំរឿងលោក សាន្ត ប៊ុនធឿន នឹងត្រូវតុលាការបើកសវនាការនៅថ្ងៃទី២៥ ខែមីនាខាងមុខនេះ ពាក់ព័ន្ធបទល្មើសបើកបរមានកម្រិតជាតិអាកុល 0,64Mg/l ល្មើសនឹងច្បាប់ចរាចរណ៍ផ្លូវគោក ត្រង់ជំពូកទី១០ ទោសបញ្ញត្តិមាត្រា៧៧។
លោក សាន ប៊ុនធឿន ត្រូវបាននគរបាលចរាចរណ៍ ឃាត់ខ្លួនកាលពីយប់ថ្ងៃទី៩ ខែមីនា នៅចំណុចគោលដៅកំបូល ផ្លូវជាតិលេខ៤ សង្កាត់កំបូល ខណ្ឌពោធិ៍សែនជ័យ។
នគរបាល បញ្ជាក់ថា លោក សាន្ត ប៊ុនធឿន បានជិះម៉ូតូម៉ាកហុងដាឌ្រីមសង់សេ១២៥ គ្មានស្លាកលេខ មានកម្រិតជាតិអាកុល 0,64Mg/l ល្មើសនឹងច្បាប់ចរាចរណ៍ផ្លូវគោក ត្រង់ជំពូកទី១០ ទោសបញ្ញត្តិមាត្រា៧៧ ។ នគរបាលបញ្ជាក់ទៀតថា នៅពេលឃាត់ខ្លួន លោក សាន ប៊ុនធឿន បានបង្កភាពបាត់បង់សណ្តាប់ធ្នាប់ដោយស្រែកឡូឡា ប្រមាថដល់ ថ្នាក់ដឹកនាំកំពូលៗ ពោលគឺប្រើចរិតច្រង៉េងច្រង៉ាង អសីលធម៌ ៕
ចំនួនអ្នកទស្សនា
- ថ្ងៃនេះ2261
- ម្សិលមិញ12561
- សប្តាហ៍នេះ30211
- ខែនេះ52091
- ឆ្នាំនេះ52091
- សរុប20494547